Monday, September 1, 2014

Tulaai leitung Thuthang Tuamtuam Updates September 1,2014



·      Kawlgam President U Thein Sein EU gam gam zinding in September 1,2014 ni in kawlgam pan zinkhia ta a , amasapeen in sapna angahna ahi Germany ah tungmasa in Eu gamsung ah ni 10 sung taamding ci in President zumpi te in taangkokhia uhhi.

·      Mualtungmi thautawi kipawlna UNFC te in Thailand gam CHinmai khuapi ah August 28 nipan khawmpi bawl uha, August 31 ani 4 na ni in KNU pan makaaite thukikupna pan nuaktaai in UNFC pan tawmvei khawlphotding in khensat uhhi. Ahizong in khawlsuakding maw kizom laaiding cih KNU Central Committee pan khensatding in gen uhhi. Ahang akigenna ah UNFC sung ah KNU in thautawi kheenpeuh kihelsak nuam uha, adangteng in deihloh nei ahihman ci in gen uhhi. Hih khawmpi ah UNA pan ZCD zongkah uha, Pu Chin Sian Thang leh apawlte zong vakah uhhi. Pu Chin Sian Thang leh U Khun Tun Oo nehtak in kiho mawk ven thukhat ongpiang khading in kilam en hi. September 1-2 dong UNFC khawmpi zomto suakding uhhi.

·      Kawlgamsung ah kawlgam kumpi phalna tawh palaizum anei gam 41 tepan e-visa kici online pan visa ngettheihna September 1 nipan ki ngen theita a , ngah le ngahloh nai khat sung in kithei in ngetman $50 ta beiding ci in kawlgam Immigration te in taangkokhia ta uhhi. Tulian laaitak in tourist visa kingah phot a adang visa te zong asawtlo in kingahding ci in gen uhhi.

·      USA gam ten kumsim nasemte ni ci a aciapteh uh September 1 ni in President Obama in Milwaukee khuapi, Wisconsin state ah thugenna nei a, kumpi in aniampeen naitha a aciangtan $7.25 pan $10.10 ah akhantoh theinading in Congress ah naakpitak in phulbehding ci in genkhia hi. Tuaban ah ama President sep kipatkum 2009 pan nasem nei 4.2% khangto a nasepzong tamzaw in khantohna kimuthei ci in genkhia hi.

·      Tuma kaal nih laaipan Pakistan gam te Prime minister ahi Nawaz Sharif apanmun pan akhawlding deihna tawh Pakistan mipi te in nasiatak in lungphona nei uha, gaalkaap ten nazialpah ziahziah ahihman in mi 3 sikhin in 100 vaal liam khin himah leh September 1, 2014 ni in PM Nawaz Sharif in ka awnkei ding ci in genkhia hi. September 2 niciang Parliament thukin meeting neiding  in geelna nei uhhi.

·      UN Human Rights Council member gam 47 te in Geneva khuapi ah thukin thukikupna September 1, 2014 ni in nei uha, Iraq gam a Christian mite mulkim huaitak a akibawlna mun ah sumtang $1.18million zangkhia in thukantel siam mi 11 paisakding in thukimna nei uhhi.

·      Russia te  in kagam Ukraine ongdodo ta hi ci in Ukraine President Petro Poroshenko in September 1, 2014 ni in Kyiv khuapi ah genkhia hi. Akizom mah in Britain Prime Minister David Cameron in Ukraine gamsung a Russia gaalkaap te aluut mawk uhpeen thumanhetlo hi ci in London khuapi pan genkhia hi. NATO te in akisapna na ah tuilam, leilam leh vanlam tawh Ukraine gam hubit a Russia te anuaiding in kigingkhin hi ci in General Secretary Anders Fogh Rusmussen Wale khuapi pan September 1, 2014  ni in taangkokhia hi. US Senators pawlkhat in zong Ukraine gam ah thau zangno meekding in Congress ah ngen ziahziah ta uhhi.  Ongmuh nop to mahmah khading hi.

·      Somalia gam sung atawlnawi migilo Al-Shabab migilo makaaipawl January kha pekpan US Vanleeng hawl palo Drone ten azandelh delh napan September 1, 2014 ni in Al-Shabab makaaite tuanna mawtaw nih Drone ten kapzan a kuateng si cih kitel naikei ci in Pentagon ten lawptak in taangkokhia uhhi.



Khialna aom leh ngaihdam bawm ah maw
Zom toto ni ei
Note tawh mapang khawm,

Thang Khawm Pauzomi

No comments:

Post a Comment