Паводле кіраўніка ўпраўленьня інфармацыі МУС Беларусі Канстанціна Шалькевіча, як мінімум 171 грамадзянін краіны падазраецца ў найміцтве на тэрыторыі Ўкраіны.
«На гэты момант галоўным упраўленьнем барацьбы з арганізаванай злачыннасьцю і карупцыяй МУС устаноўлены 171 грамадзянін, у дачыненьні да якога ёсьць зьвесткі пра ўдзел у баявых дзеяньнях за матэрыяльнае ўзнагароджаньне, гэта значыць найміцтва», — паведаміў «РИА Новости» Шалькевіч.
Ён адзначыў, што ў асноўным гэтыя грамадзяне ваявалі альбо працягваюць ваяваць за абодвух бакоў узброенага канфлікту на тэрыторыі Ўкраіны, але большая іх частка — на баку самаабвешчаных Данецкай і Луганскай народных рэспублік.
Нядаўна ў заканадаўства Беларусі былі ўнесеныя зьмены, у адпаведнасьці зь якімі ўдзел у баявых дзеяньнях на тэрыторыі іншай дзяржавы, нават без прыкмет найміцтва, зьяўляецца крымінальным злачынствам.