കോഴിക്കോടിന്റെ സിനിമാ-നാടകരംഗത്ത് നിറസാന്നിധ്യമായിരുന്നു ശനിയാഴ്ച അന്തരിച്ച കെ. അബ്ദുള്ളയെന്ന കെ.ടി.സി. അബ്ദുള്ള. സ്കൂളില് പഠിക്കുന്ന കാലത്ത് നാടകങ്ങള് എഴുതി, അഭിനയിച്ചാണ് തുടക്കം. പിന്നെ കാണാക്കിനാവിലെ അധ്യാപകന്, കാറ്റത്തെ കിളിക്കൂടിലെ റിക്ഷക്കാരന്, അറബിക്കഥയിലെ അബ്ദുക്ക, യെസ് യുവര് ഓണറിലെ കുഞ്ഞമ്പു, ഗദ്ദാമയില ഗള്ഫുകാരന് തുടങ്ങി ശ്രദ്ധേയമായ വേഷങ്ങള് അബ്ദുള്ള അവതരിപ്പിച്ചിട്ടുണ്ട്.
കേരള ട്രാന്സ്പോര്ട്ട് കമ്പനി (കെ.ടി.സി.)യില് ചേര്ന്നതിന് ശേഷമാണ് ഇദ്ദേഹം കെ.ടി.സി. അബ്ദുള്ളയായത്. 1959-ലാണ് അബ്ദുള്ള കെ.ടി.സി. യില് ജോലിയില് പ്രവേശിച്ചത്. കലയില് തത്പരരായ കെ.ടി.സി.യുടെ ഉടമകള് നാടകപ്രവര്ത്തനത്തിന് എല്ലാവിധ പിന്തുണയും നല്കി.
റേഡിയോ നാടകരംഗത്ത് 'എ ഗ്രേഡ്' ആര്ട്ടിസ്റ്റായിരുന്നു. പാളയം കിഴക്കെക്കോട്ട പറമ്പിലാണ് അബ്ദുള്ള ജനിച്ചത്. ഡ്രൈവര് ഉണ്ണിമോയിന്റെയും ബീപാത്തുവിന്റെയും മകനായി 1936-ലാണ് ജനനം. ബൈരായിക്കുളം, ഹിമായത്തുല് ഇസ്ലാം സ്കൂള്, ഗണപത് ഹൈസ്കൂള് എന്നിവിടങ്ങളിലാണ് പഠനം. നാടകഭ്രമം മൂത്ത് എട്ടാംക്ലാസില് പഠനം നിര്ത്തി കലാരംഗത്ത് സജീവമായി. ആദ്യനാടകത്തില് സ്ത്രീവേഷമാണവതരിപ്പിച്ചത്. എ.കെ. പുതിയങ്ങാടിയുടെ 'കണ്ണുകള്ക്ക് ഭാഷയുണ്ട്' എന്ന നാടകം മലബാര് നാടകോത്സവത്തില് അവതരിപ്പിച്ചപ്പോള് നടി വരാതിരുന്നതോടെയാണ് അതില് പെണ്വേഷം അണിയേണ്ടി വന്നത്. പിന്നീട് പി.എന്.എം. ആലിക്കോയയുടെ 'വമ്പത്തി നീയാണ് പെണ്ണ്' എന്ന നാടകത്തിലും സ്ത്രീ കഥാപാത്രത്തെ അവതരിപ്പിച്ചു.
പഠിക്കുന്ന കാലത്തുതന്നെ യു.ഡി.എ. (യുണൈറ്റഡ് ഡ്രമാറ്റിക് അക്കാദമി) എന്ന നാടകസംഘടനയുടെ രൂപവത്കരണത്തില് പ്രധാനപങ്ക് വഹിച്ചു. സംഘടനയുടെ സെക്രട്ടറി, പ്രസിഡന്റ് എന്നീ സ്ഥാനങ്ങള്വഹിച്ചു. യു.ഡി.എയുടെ ജനറല് സെക്രട്ടറിയായിരുന്നു.
Content Highlights : KTCAbdulla died film drama artist KTC Abdulla Mohanlal Hariharan
Also Watch
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..