Mnre. Lindon Wagner (21), Robin Harwood (18), Lester Evan Nathaniel Moody (18) en Jeremy King (18) het gister op twee aanklagte van poging tot moord in die Johannesburg-streekhof verskyn.
Hulle het me. Kirsty Theologo (18) en haar 14-jarige vriendin glo Vrydagaand met toue vasgebind, petrol oor hulle uitgegooi en hulle aan die brand gesteek nadat hulle saam met dié twee slagoffers en nog twee minderjarige meisies op een van die koppies agter The Glen-winkelkompleks in die suide van Johannesburg gekuier het.
Die polisie het vroeër gesê twee van die vier meisies kon hulself bevry en weghardloop.
Die vier mans het hulself onderskeidelik Sondag en Maandag aan die polisie oorgegee.
Me. Colleen Ryan, staatsaanklaer, het streeklanddros Lucas van der Schyff gister gevra om te gelas dat die beskuldigdes vir die volgende week by die Booysens-polisiekantoor aangehou word vir verdere ondersoek.
“Die staat wil graag bloedmonsters van die beskuldigdes neem sodat dit met bloed vergelyk kan word wat op die toneel gevind is,” het sy gesê.
Ryan het ook gesê die vier kan dalk later van moord aangekla word, afhangend van Theologo se toestand.
Wagner het in die hof gesê hy wil sy eie regsverteenwoordiging behartig. Van der Schyff het hom egter daarteen gewaarsku en aangeraai om eerder ’n regsverteenwoordiger te bekom.
Die vier moet weer volgende maand in die hof verskyn.
- Me. Theonor Theologo, Theologo se tannie, het gistermiddag aan Wolfram Zwecker gesê haar herstel is ’n dag-vir-dag-proses.
Mnre. Lindon Wagner, Lester Evan Nathaniel Moody, Robin Harwood en Jeremy King gister buite die Johannesburg-streekhof.
Foto: Nelius Rademan