- السيسي : لو الشعب " كله " عايزنى أمشى هامشى من غير ما تنزلوا
إحنا مانعين التظاهر ومبنعملش إنتخابات محترمة .. وبنحل إتحاد الطلبه لإن نتيجة الإنتخابات مش على مزاجنا .. ومعتقلين 60 ألف بني أدم وبنطارد المعارضين .. بس " كل " الشعب لازم يقول للرئيس أمشي .. ديموقراطية " كله " يا وليد .
****************************************
- - "الداخلية": مواطن قطع أصبعين من يده وادعى تعرضه للتعذيب في أحد أقسام الشرطة .
الظلم والأفترى على الشرطة مستمر للأسف .. مواطن مصري دخل قسم الشرطة في شبين القناطر إللي مقتول فيها واحد من اسبوعين .. ضرب نفسه .. وعذب نفسه في اماكن حساسه .. وبعدين قطع صوابعه .. علشان يشوه صورة الشرطة .. بس الحمد لله كشفناه .. تحيا مصر 3 مرات ورا بعض بصوت الاستاذ يوسف شعبان .
**************************************
- دورة تدريب «النواب الجدد»: لا يحق للمجلس مناقشة قوانين منصور والسيسي
السلطة التنفيذيه عاملة دورة للسلطة التشريعية .. بيفهموهم إن دور النائب هو عدم الإعتراض على قرارات عدلي منصور والسيسي .. جمهوريات الإندومي بطعم الرنجة grin emoticon
**************************************
- المذيعة دعاء صلاح .. تبهر جمهورها وتبهرني وتبهر أحمد التباع .. وتخرج على جمهورها في قناة النهار وهيا بتستحمى في البانيو .
أيون .. إنت قريت الخبر صح .. بتستحمى في البانيو ؛ الناس إتجننت وأقسم بالله grin emoticon
*************************************
- إعادة انتخابات اتحاد طلاب مصر بعد إكتساح تيار ثورة 25 يناير .
بص يا سيدي .. تيار الثورة فاز بغكتساح 13 مقعد من 16 .. وسيطر على كل اللجان الرئيسية ومنصب الرئيس والنائب .. قوم النظام " يتقمص " بعد ما سحقنا تحالف الأمنجية .. وهيعيد الإنتخابات .. والله يا جدعان الديكتاتوريات عيلت عالأخر .
***********************************
- «الداخلية»: لا يوجد أي حالات اعتقال في مصر .
إحنا أساسا معندناش وزارة داخلية .. الفكرة بس إن الأولاد بيحبوا يقضوا الويك إند في سجن العقرب .. يغمضلناش عين غير ما نختفي قسريا مرة على الأقل كل شهر ..
*************************************
- البنك المركزي: استيراد «قمصان نوم» بـ103 ملايين دولار خلال عام 2015
إستوردنا ب 800 مليون جنية قمصان نوم ولانجيري يا ولاد .. إحنا لو بننتج أفلام " بورنو " مش هنستهلك كل دة يا ولاد الجزمة grin emoticon
************************************
- مجلس إدارة « صندوق تحيا مصر» يهاجم « هشام جنينة» لكشفه وقائع فساد بـ600 مليار جنيه.
بص يا سيدي .. هشام جنينة ماسك قواضي فساد ب 600 مليار جنية .. بقاله سنتين بيقول يا اخوانا حققوا فيها .. صندوق تحيا مصر بقى .. شايف إن قضايا الفساد إللي بيعلن عنها هشام جنينة وإللي اساسا محدش بيحقق فيها .. شايف إن ده بيضر بإقتصاد البلد وإن هشام جنينة إخوان grin emoticon
.. دول المفروض اللي بيخططوا لإقتصاد مصر شايفيتن إننا لازم نداري عالفساد .. علشان الإقتصاد المصري.
البودرة هي الحل واقسم بالله grin emoticon
*********************************
- أخيرا .. ظهر بالأسوف حلاوة المولد من إنتاج مخابز الجيش الثاني الميداني .. والكيلو ب 18 جنية .
خير سمسميات الأرض .. فخر الانتاج العسكرى للقوات المسلحة
**********************************
- عودة تمثال توت عنخ أمون بعد إصلاح " الذقن " التي أتلفها فريق الترميم المصري .
قبل 6 شهور .. دقن قناع توت عنخ امون كانت محتاجة تثبيت .. فنيين المتحف المصري لزقوها بمعجون " الأمير والصمغ " .. حرفيا بالأمير حضرتك والله .. طبعا التلف ذاد .. بعتناها لألمانيا .. والجماعة بقالهم 6 شهور بيعالجوا إللي تسبب فيه الفريق المصري .. وكلفنا كام مليون دولار ..
بالأمير والصمغ يا ولاد .. توت عنخ أمون لو عايش .. كان زمانه تاجر مخدرات من إللي بنشوفه في البلد دي .
***********************************
- حظر النشر عن مشروع المحطة النووية بالضبعة إلا بعد الرجوع للجهات المختصة .
هيفاجئونا بقى .. طبعا واحد يسألني هتعرف إن المفاعل إنفجر ازاي لو وقفوا النشر .. هقولك لما تصحى تلاقي أخوك بقى ب 3 عيون وإبنك بيتنفس من الخياشيم وشريف مدكور طلعله دقن .
هانت يا ولاد والله grin emoticon
**********************************
- وزارة العدل تدافع عن قرار تعين 400 ضابط شرطة بالنيابة .
يعني غالبا لو في ظابط عذبك قبل سنتين والقضية لسة شغالة ... وارد جدا يحكم فيها او يكون طرف في هيئة القضاء نفس الظابط إللي عذبك ... انا مبسوط من مصر جدا والله .. حاجة كدة أخر كنافة والله grin emoticon
*************************************
- وزارة الداخلية تنظم مسابقة بحثية لضباط الشرطة فى مجال التوازن بين الأمن وإحترام حقوق الإنسان .
مش بس كدة .. دا بحث عن دور الداخلية في نشر ودعم مبادئ وقيم حقوق الإنسان بكافة قطاعات الوزارة والتأكيد على كافة حقوق وحريات المواطنين وصون حرياتهم.
دي غالبا مسابقة بحثية في مجال الخيال العلمي grin emoticon
*********************************
- جائزة أفضل بيمب مصطفى بكري .. تذهب للأسبوع الثاني على التوالي لمؤسسها مصطفى بكري ذات نفسه .. وتعليقه على تصريحات السيسي بشأن الرحيل: " أنا اتخضيت لما السيسي قال همشي.. ومين هيسمح لك تترك الحكم "
أتعبت كل البيميات من بعدك يا درش .
**********************************
- «النزاهة والشفافية»: ارتفاع معدل الرشوة في النيابات والمحاكم وأقسام الشرطة
هيئة النزاهه .. بتقذف المحصنات في النيابة والمحاكم بإنهم بياخدوا رشاوي .. انا إندهشت الحقيقة .. هوا في حد لسة مبياخدش رشاوي فيهم smile emoticon
*******************************
- وزيرة الهجرة أنا قبطية أسعى لنشر الإسلام المعتدل بين المصريين فى الخارج وسأستعين بالفنانين والمثقفين وليس «الأئمة»
كفاية إنبهارات يا مصر .. كفاية بقى grin emoticon
********************************
- القضاء الإداري يلزم الحكومة بالإفصاح عن التسويات التي تُجرى على عقود الدولة المتعلقة بالمال العام
أحلى ما في الخبر دة .. إنكوا لازم تعرفوا إن بعد 30 يونيو .. لسبب مجهول قررت الحكومة إصدار قانون غريب مش موجود غير في مصر إسمه " تحصين /أو تقييد الطعن على عقود الدولة " .. القانون ده اصدره حازم الببلاوي .. وكان معاه قانون لطيف تاني بيعمل إسناد مباشر للمشاريع .. ايوا هوا القانون كدة .. تحصين العقود .. يعني الحكومة تسند المشروع لشركة تبع الجيش .. مش من حق حد يطعن بقى على طريقة إسناد المشروع smile emoticon
بلدنا جميلة يا ولاد .. إثروا الخبر دا بالذات في تفاصيل لوز smile emoticon
*****************************
- صرف مكافأة ٩ شهور للعاملين بمصر للطيران ..
اه والنعمة 9 شهور مش شهر ولا شهرين .. إحنا من أسوأ 10 شركات طيران في العالم .. ومؤخرا بقينا الأسوأ على العالم في إجراءات الأمن في مطاراتنا .. فنعمل إية ؟ نعمل إية ؟؟؟ أيون .. نصرفلهم 9 شهور مكافئة grin emoticon
********************************
- مبروك ... الحكومة الإسرائيلية توافق على تصدير غاز طبيعي لمصر .
إحنا إكتشفنا أكبر حقل غاز طبيعي في العالم والسعودية قررت توفرلنا كل إحتياجاتنا من الغاز والبترول .. يبقى نستورد الغاز من إسرائيل بقى .. دا كلام الناس العاقلين grin emoticon
*********************************
- شركة كنترول ريسكيس البريطانية تفوز بعقد تأمين المطارات المصرية .
هوا أي نعم بريطانيا دولة بتتامر علينا .. بس تعالوا نتفق إن التأمين مش شغلة الجيش .. إحنا في موسم حلاوة المولد .. ندوق الحمصية والسمسمية .. وبعدين نحكم يا حضرات grin emoticon
**********************************
- ضبط راكبة بحوزتها صورة من كتاب لـ"غسان كنفاني" بمطار القاهرة
اه والله هما إشتبهوا فيها علشان معاها إيميلات بعض الأشخاص وصورة لكتاب لغسان كنفاني .. يكونش موضوع الكنافة ضايقهم وحاسوا بالمنافسة إنهم مش بس إللي جمهورية كنافة grin emoticon
********************************
- السيسي : ''كل واحد يستعد للحساب'' .. ويحذر نواب البرلمان الجديد من الدخول في نقاشات
إحنا متنا يا جماعة وهنتحاسب ... إحنا عايشين في جمهورية رئيس السلطة التنفيذيه بيهدد السلطة التشريعية .. أخرااااااابي
*********************************
- حزب مستقبل الوطن بتاع المخابرات الحربية .. بيشتم في إئتلاف سامح سيف اليزل بتاع المخابرات العامة.. عبد الرحيم علي بقى المؤيد للنظام .. شتم إئتلاف سامح سيف اليزل المؤيد للنظام بردوا .. حزب الوفد بقى إللي بيأيد السيسي شايف إن التحالفات إللي بتأيد السيسي يتضر هيبة الدولة .. احمد موسى بقى هاجم ائنلاف في حب مصر وقال إن في صوابع بتعبث في البرلمان .
وطن مسلي جدا grin emoticon
**********************************
- إخلاء سبيل الضابط المتهم بقتل «طبيب الإسماعيلية» .
دا الظابط إللي قتل طبيب الإسماعيلية بالتعذيب والضرب.. والناس إتظاهرت وكدة .. أخد إخلاء سبيل أول إمبارح smile emoticon
***********************************
- مصادر أمنية وشهود يؤكدون مقتل شادي المنيعي في رفح .
دي المرة ال 15 إللي يعلنوا ففيها عن مقتل شادي المنيعي .. يا جدعان دا شادي .. أمال لو اسمه عبعزيز وألا عبرحيم كان عمل فينا إية ؟؟
******************************
- وفاء عامر: «مستعدة أعمل شاي لجنودنا في سيناء بس يقبلوني»
طبعا هيبقى شاي بلبن حضرتك grin emoticon
***************************
- رئاسة حي ثاني طنطا تقوم برش أكوام الزبالة لتعقيمها .. بالتعاون مع هيئة الطب البيئي وبتوجيهات من المحافظ ووزير البيئة ورئاسة الحي ..
إحنا دخلنا حاليا في مرحلة التعايش السلمي مع الزبالة خلاص فقدنا الأمل في إننا نتخلص منها.. إحنا في مرحلة حل الدولتين والعيش المشترك في سلام .. بنعقمها ونضفها علشان الناموس والدبان ميضايقهاش ..