根據明報報導，公司註冊處要求查冊人選擇查冊目的，唔揀選就冇得登入。公司註冊處話「查冊所得的資料只能作查冊人士所聲明的用途。」，又話「如將資料作為並非「收集個人資料聲明」所述的用途，或違反《個人資料(私隱)條例》的規定，均須支付補償，並可能遭受根據該條例而提出的訴訟。」
保障資料第3原則（見《個人資料（私隱）條例》附表一）係有講「如無有關的資料當事人的訂明同意，個人資料不得用於新目的。 」換句話講，除非資料當事人自願同埋明確同意，個人資料只限用於收集時講明嘅目的或直接相關的目的。
不過違反保障資料原則本身並唔係刑事罪行。私隱專員（一般係根據投訴調查後）發出「執行通知」，要求違反人士或者藉口採取補救措施。你當佢冇到，唔遵守執行通知先至係刑事罪行。
保障資料第3原則實際執行並不容易，好大程度靠自律。坦白講，唔少人都懷疑佢哋嘅個人資料，都被啲無良嘅商業機構攞咗（或賣咗）去做同收集時講嘅完全唔同嘅目的，但佢死口唔認你都好難有佢符。
更加重要嘅係，《個人資料（私隱）條例》第八部分提供咗唔少豁免，包括防止罪行及其他不當行為（第58條）、新聞活動（第61條：公眾利益可以係抗辯理由）同埋研究和統計（第62條）都可以獲豁免，而不受第3保障資料原則的條文所規限。但公司註冊處就呢啲豁免就一句不提。
咁樣樣，公司註冊處講啲唔講啲，但又淨係比得6個基本淨係同商業運作有關嘅查冊目的比人揀，做咩啫你？